STOP violencia machista

Fonte foto: http://revocultura.blogspot.com.es/2011/11/ufpedialogos-alegria-e-ousadia.html

Dende Anova das asembleas de Lemos, Sober e Chantada rexeitamos rotundamente a agresión machista sufrida por unha moza de Chantada na noite de onte, martes 26 de agosto, a mans da súa parella.

A lacra da violencia machista no que vai de ano provocou 42 mulleres asasinadas polas súas parellas ou ex-parellas en todo o Estado.

Tolerancia cero coas agresións, recortes cero en prevención da violencia machista.

Agardamos que a vítima se recupere e que, como expresou a cidadanía de Chantada na concentración de hoxe pola mañá: "que nunca volva suceder".

Esta mañá convocouse tamén un pleno extraordinario en Chantada para condenar a agresión.

Anova apoia un proceso de candidatura cidadá en Chantada

Foto: Voz de Galicia-Lemos. 2012

Anova Chantada mantivo o pasado sábado, día 9 de agosto, unha xuntanza ordinaria na que se tratou, entre outros asuntos, da participación da Organización nas próximas eleccións municipais de maio do 2015. 

Anova Chantada tomou a decisión de deixar en suspenso a elaboración dunha candidatura propia e invitar á sociedade, incluídas outras organizacións políticas do ámbito da esquerda, a iniciar un proceso aberto como o proposto por somosmaioria.org, de confluencia cara a creación dunha candidatura cidadá para as eleccións locais. 

Anova Chantada está convencida da existencia dunha maioría social da que pode xurdir un Programa Común que sirva de vehículo as enerxías da sociedade cara a solución dos problemas colectivos. 

Anova Chantada desexa que se inicie canto antes un proceso como o que propoñemos e está disposta a participar activa e xenerosamente en conseguir que culmine con éxito. 

 Chantada,11 de agosto de 2014.

Anova aposta por unha candidatura cidadá en Monforte

Anova de Lemos está a favor dunha candidatura de unidade cidadá para a cidade de Monforte. 

Anova de Monforte aposta por un proceso “aberto a toda a cidadanía ubicada nestas coordenadas, sen dirixismos, sen siglas, sen reservas de cotas de poder, protagonizado pola sociedade civil, asembleario, e que culmine na elaboración dun programa político para as monfortinas e monfortinos e nunha candidatura municipal disposta a poñer as institucións ao servizo do pobo.” 

Anova sumarase ao proceso cidadán que resulte darse en Monforte coma unha organización máis, porque vivimos tempos nos que hai que confluír fronte ás políticas que esmagan á maioría social, por iso facemos un “chamamento a todos os partidos políticos, colectivos, asociacións, mulleres, homes, mozas, mozos que apostan por unha creba constitucional orientada a garantir unha maior participación cidadá, ao avance democrático e ao fortalecemento do pobo galego como ente que aspira a ser plenamente soberano.” A proposta de Anova de Monforte pode coñecerse en:

www.candidaturacidadamonforte.wordpress.com